‏إظهار الرسائل ذات التسميات مملكة الحكي. إظهار كافة الرسائل
‏إظهار الرسائل ذات التسميات مملكة الحكي. إظهار كافة الرسائل

مملكة الحكي

ـ1ـ
.. وْفَكَّرتْ حَالِي حْكِيتْ!!
تَارِي الْحَكِي غْبَاشِه
بْشُوفُو أَنَا وْمَاشِي
لَمْعِةْ قَدَحْ كبْرِيتْ.
ـ2ـ
لا تْقُولْ إِنِّي سْمِعْتْ!!
حَكْيِي أَنَا مَلْمُوسْ،
حْرُوفُو عَ وَرْقَه جْمَعْتْ
وْعِلَّقْتُنْ بْدَبُّوسْ
قُونِه عَ صدْر الكَوْنْ
مَغْرُومْ فِيهَا اللَّوْنْ
وْفِيهَا الْعطر مَحْبُوسْ.
ـ3ـ
.. وْصِرْتْ بِلْيَالِي الْبِكِي
إِجْبُلْ مِنِ تْرَاب الْحَكِي
إِنْسَانْ..
إِسْأَلْ : يْجَاوِبْنِي
إِزْعَلْ : يْعَاتِبْنِي
وْيِرْسُمْ عَ كَفِّي مَمْلَكِه
بْخِيطَانْ
مِنْ دخَّانْ..
وِيْقُولْ : يَا إِبْنِي
إِنْتَ الْمَلَكْ
مَا أَجْمَلَكْ
شْلَحْت الدِّنِي كِلاَّ
بْإِيدَكْ تَا تِتْسَلَّى
أَللّـه خَلَقْهَا مْشَرْبَكِه
لا تْزَعّلُو لأَللّـه
بِشْطَارْتَكْ حِلاَّ...
ـ4ـ
.. وِضْحِكِتْ لِمِّنْ قِلْتْ:
وْصِلْتْ..
لوَيْنْ؟.. مُشْ مَعْرُوفْ!!
وِالدَّرْبْ قدَّامِي
مَرْصُوصْ بِعْضَامِي
بْآهَاتْ.. كِيفْ مَا مِلْتْ
بِتْفَرْفِطِ كْلامِي
بْنَهْدَاتْ وِقْفُوا صْفُوفْ
عَ شْطُوطْ أَحْلاَمِي
.. وْيَا وَقْعِةِ التِّفْكِيرْ
الْـ مَا بَعِدْهَا وَقْعَه:
مَلْيُونْ حَرْف زْغِيرْ
بْيِتْجَمّعُوا نْوَاطِيرْ
عَ جْوَانِبِ الدَّمْعَه
وْفُورْ يَا دَمِّي
وْزِيدْ يَا هَمِّي
كِيفْ بَدِّي إِكْتُب بْسِرْعَه
وِالْعُمرْ وَلْعَه؟!
كِيفْ بَدِّي رَافِقِ الْكِلْمِه
وْمُشْ آمْنِه الرَّجْعَه؟!
**